Projet AquaPilot 
– E gemeinsame Projet tëscht de Gemengen Oberbillig a MäertertAm Zäitraum vum 01.02.2025 – 01.02.2028 fënnt dësen INTERREG-Projet, an Zesummenaarbecht mam Entwicklungskonzept Oberes Moseltal, tëscht de Gemengen Oberbillig a Mäertert statt. Hei geet et drëms, déi grenziwwerschreident Mobilitéit mat Däitschland, duerch d’Färverbindung tëscht Waasserbëlleg an Oberbëlleg, ze stäerken.
Weider Partner an dësem Projet sinn d‘Verbandsgemeinde Konz, de Lëtzebuergesche Ministère vum Transport an den ëffentlechen Aarbechten an de Ministère fir Landwirtschaft, Verkéier a Wäibau aus Rheinland-Pfalz.
Opgrond vum Personalmangel gëtt d’Fär Sankta Maria II deelweis- a perspektivesch och komplett automatiséiert. Hei gëtt modern Technik, vun de Sensoren an intelligenter Steierung, bis hin zum digitale Keessesystem an ugepassten Uleegestellen, agesat, déi et dann erméiglechen en ëmweltfrëndlechen, resilienten an effiziente Betrib mat reduzéiertem Personal u Bord sécher ze stellen.
Et kënnt zu enger erhéichter Verléisslechkeet a verlängerte Betribszäiten, wat d’Ubannung u Bus, Bunn a Vëlosweeër ugeet an erliichtert déi kombinéiert Mobilitéit am Alldag an an der Fräizäit.
